പൊതുജനങ്ങൾക്ക് സർക്കാർ വകുപ്പുകളുടെയും സ്ഥാപനങ്ങളുടെയും പ്രവർത്തനങ്ങളെക്കുറിച്ചുള്ള വിവരങ്ങൾ അറിയാനുള്ള അവകാശം ഉറപ്പാക്കുകയാണ് വിവരാവകാശ നിയമത്തിന്റെ പ്രധാന ലക്ഷ്യം. ഭരണകാര്യങ്ങളിൽ സുതാര്യത വർധിപ്പിക്കുക, സർക്കാർ ഉത്തരവാദിത്തം ഉറപ്പാക്കുക, അഴിമതി നിയന്ത്രിക്കുക എന്നിവയും ഈ നിയമത്തിന്റെ പ്രധാന ഉദ്ദേശ്യങ്ങളാണ്.

• സംസ്ഥാന സർക്കാരിന്റെ പരിധിയിൽ വരുന്ന വകുപ്പ് / സ്ഥാപനങ്ങളിൽ നിന്നും വിവരങ്ങൾ തേടുന്നവർ ബന്ധപ്പെട്ട സ്റ്റേറ്റ് പബ്ലിക് ഇൻഫർമേഷൻ ഓഫീസർ (SPIO) നു അപേക്ഷ സമർപ്പിക്കണം.
• അപേക്ഷ എഴുതിയോ ഇലക്ട്രോണിക് മാധ്യമങ്ങൾ വഴിയോ സമർപ്പിക്കാം. ആവശ്യപ്പെടുന്ന വിവരങ്ങൾ വ്യക്തമായി രേഖപ്പെടുത്തണം. അപേക്ഷയുടെ ഉദ്ദേശ്യം വ്യക്തമാക്കേണ്ടതില്ല.
• അപേക്ഷയോടൊപ്പം നിശ്ചിത ഫീസ് നൽകണം. ദാരിദ്ര്യരേഖയ്ക്കു താഴെയുള്ളവർക്ക് ഫീസ് ഒഴിവാക്കിയിരിക്കുന്നു.
• വിവരാധികാരി പരമാവധി 30 ദിവസത്തിനുള്ളിൽ വിവരം നൽകുകയോ അപേക്ഷ നിരസിക്കുകയോ വേണം.
• വ്യക്തിയുടെ ജീവനും സ്വാതന്ത്ര്യവുമായി ബന്ധപ്പെട്ട വിവരങ്ങൾ 48 മണിക്കൂറിനുള്ളിൽ നൽകേണ്ടതാണ്.
• മറ്റൊരു ഓഫീസിന്റെ പരിധിയിലുള്ള വിവരമാണെങ്കിൽ അപേക്ഷ 5 ദിവസത്തിനുള്ളിൽ ബന്ധപ്പെട്ട അധികാരിക്ക് കൈമാറണം.
• ഇന്ദ്രിയ വൈകല്യമുള്ള അപേക്ഷകർക്ക് ആവശ്യമായ സഹായങ്ങൾ നൽകേണ്ടത് പൊതുവിവരാധികാരിയുടെ ഉത്തരവാദിത്വമാണ്.
• അപേക്ഷ നിരസിക്കുകയാണെങ്കിൽ അതിന്റെ കാരണം, അപ്പീൽ സമയപരിധി, അപ്പീലധികാരിയുടെ വിലാസം എന്നിവ അപേക്ഷകനെ അറിയിക്കണം.